СНИЛС орнунга чуу турарыл?
"СНИЛСтерни удавас ап кааптар деп дыӊнаан мен, ол шын бе? Ону чүү-биле солуурул?" - Оюн А., Пий-Хем кожуун.
Хамаатыныӊ хууда агар саныныӊ камгаладылга херечилели азы болза бөдүүнү-биле СНИЛС электроннуг хевирлиг апаар. Ол чүл дизе, Россияныӊ Пенсия фондузунуӊ камгаладылга системазында бир дугаар бүрүткеттиннип турар хамаатыларга чүгле тускай дугаарны тыпсыр.
Ук ѳскерилгени «Албан пенсия камгаладылгазыныӊ системазында хууда учёт дугайында» деп Федералдыг хоойлуже база РФ-тиӊ тускай хоойлужудулга актыларынче ѳскерлиишкиннер киирериниӊ дугайында деп» 2019 чылдыӊ апрель 1-ден №48 Федералдыг хоойлуда быжыглаан. Чаартылганы чоорту чорудар.
Ынчап кээрге хуу учёт системазыныӊ киржикчилериниӊ дугайында бүгү медээ элеткроннуг хевирге шыгжаттынар.
Камгаладылга дугаарын кайыын ап аарыл?
Россияныӊ Пенсия фондузунуӊ хууда учёт системазында бүрүткеттинген деп база бодунуӊ камгаладылга дугаарыныӊ дугайында медээни кижи бүрүзү канчаар ап алырын боду шиитпирлээр. Электроннуг хевирде документини Интернет, ооӊ иштинде күрүне ачы-дузазыныӊ чаӊгыс аай порталы, ол ышкаш почта таварыштыр база ап болур. Документ боду болза кижиниӊ ат-сывын база ооӊ хуу дугаарын айыткан бѳдүүн саазын болуп турар.
Ооӊ мурнунда алган СНИЛСтерни хевээр ажыглап болур.
Бир эвес кижи СНИЛСти чидирип алыр болза, аӊаа база катап ногаан карточканы бербес, а чүгле ооӊ дугаарын бээр – электроннуг хевирге. Хамаатыныӊ хууда кабинеди таварыштыр, саазынга – Пенсия фондузунуӊ девискээр органнары таварыштыр.
Электроннуг СНИЛСтиӊ кол ажыы - үе камнаарында!
СНИЛСтиӊ электроннуг хевири хууда учёт системазынга бүрүткелди бѳдүүнчүдүп база дүргедедип турар. Чижээ, ава кижи чаш тѳлүнүӊ СНИЛСзи дээш үезин чарып, Пенсия фондузунче кээп турбас. Чаш уругнуӊ тѳрүттүнгениниӊ дугайында медээни ЗАГС Пенсия фондузунче чорудуптар. Пенсия фондузу бичии чаштыӊ азы улуг кижиниӊ бүрүткелин албан пенсия камгаладылгазыныӊ системазынга чорудар. Уругларыныӊ камгаладылга дугаарларын ава кижи бажыӊындан үнмейн, Интернет таварыштыр ап алыр аргалыг болур.